காதலாகி வாடா

இந்த கதையில் சிக்கல் இருகிறதா என்று எனக்கு தெரியவில்லை . ஆனால் இதை எழுதுவதில் இருக்கும் சிக்கல் தெரிந்தேயிருக்கிறது. கொஞ்சம் அலுப்பாக இருந்தது எனக்கு . வழக்கமாக இந்த டைப் கதைகளை முதல் பாராவிலேயே யூகித்து விடலாம் . இதுவும் அந்த ரகம் தான் . ஒரு சிகரெட்டை பற்ற வைத்தேன் .

மூன்றாவது முறையாக முகத்துக்கு சோப்பு போட்டுக் கொண்டிருந்தேன் . வாசலில் சைக்கிள் பெல் கேட்டது . வந்துட்டா சண்டாளி..சக்களத்தி..புவனா..பிசாசு...ஆனால் மத்தவங்களுக்கு தேவதை....அழகிய அசுரன்களுக்கு தேவபானம்.

அரை மணி ஆச்சு புவனா..அந்த தேய் தேய்க்கிறா..என்ன தேய்ச்சாலும் காக்கா கறுப்பு உதிர்ந்துடுமா என்ன ? இந்த நியாயத்தை நீயே கேளுமா புவனா . நேத்து ராத்திரி படிக்காம உம்முனு உக்கார்ந்திருந்தா . என்னடி சாப்பிடறியான்னு கேட்டேன் .

ஏம்மா நீ சாப்பிடலை ?

அடிப்பாவி . இப்பதான் உன் கண்ணு முன்னாடி கொட்டிகிட்டேன் .

சனியனே . அதை கேக்கலை . நான் உன் வயித்துல இருந்தப்ப ஏண்டி குங்குமப்பூ சாப்பிடலைன்னு கேட்டா பாரு . என்னம்மா ஆச்சு ? யாராவது எதாவது அவ நிறத்தை கிண்டல் பண்ணாங்களா ?

பார்றா . ரெண்டு பேரும் கட்சி பிரசாரத்துக்கு போறாப்ல இருக்கு . கருப்பும் , சிவப்பும்... பெரிதாக சிரித்தார்கள் அந்தப் பையன்கள் .

எனக்கு அவர்கள் மேல் கோபம் வரவேயில்லை . இந்த சண்டாளி புவனா மீதுதான் வந்தது . சனியன் . என் கூட வராதடின்னு சொன்னா கேக்க மாட்டா . ஆனா நானும் அவளும் ஒன்னாவதுலேர்ந்து ஒன்னாத்தான் படிக்கிறோம் . எனக்கு ஒன்னுன்னா உசுரையே விட்ருவா தெரியுமா ?

பின்னால் யாரோ பெல் அடித்தார்கள் . யாரோ இல்லை .

அவன் தான்டி புவனா .

பேசாம வாடி .

சொன்னாலேயொழிய புவனாவின் முகத்தில் ஒரு மின்னல் வெட்டியது . ஏற்கனவே மினுமினுத்த உதடுகளை நாவால் ஈரப்படுத்திக் கொண்டே , கடந்து போனவனை ஓரக்கண்ணால் பார்த்தாள் .

உனக்கு அவனை பிடிச்சிருக்காடி ?

சீ..சீ.. சும்மாத்தான் . இவன் மட்டுமா என்னை சைட் அடிக்கிறான் . பாலு , கணேசன் . அதுவும் கணேசன் விட்டா , கால்லயே விழுந்துடுவான் . இவன் பேர் தெரியுமாடி உனக்கு ?

எனக்கு அவன் பெயர் தெரியாது . ஆனால் அவனுக்கு நான் ஒருபெயர் வைத்திருக்கிறேன் . ராஜகுமாரன் . தேருக்கு பதில் சைக்கிள் . அதில் அவன் பின்னால் இல்லையில்லை முன்னால் உட்கார்ந்து போகிறேன் . ரெண்டு பக்கமும் வாய்க்கால் ததும்ப ஓடுகிறது . நடுவில் நாங்கள் .

ஒரு கவிதை சொல்லவா ?

சொல்லேன்டா ராஜகுமாரா ..

சொல்வேன் . ஆனா உன் பேர் எனக்கு தெரியாதே .

சொல்லட்டுமா ?

வேண்டாம் . நானே உனக்கு ஒரு பெயர் வைத்திருக்கிறேன் .

பெல்லடித்தது . கிளாசில் என் பெயரை அழைக்கிறார்கள் . வருகை பதிவேடுக்கு .

ராஜகுமாரி என்கிறான் என் ராஜகுமாரன் . குப்பென்று வியர்த்தது எனக்கு . பாவியா நான் .

என்னை இறக்கி விடுடா என்கிறேன்


ஏண்டி பெஞ்சு மேலயா நிக்கறே . இறக்கி விடுதற்கு என்கிறாள் புவனா . ஒட்டு மொத்த கிளாசும் சிரித்தது . எனக்கு அவமானமாக இல்லை . ஆசையாக இருந்தது . ஒரே முறை.. அந்த சாலை.. அவனுடன் சைக்கிளில் ... அதை புவனா பார்க்க வேண்டும் . நான் செத்து போகிறேன்டா பாவி .


எனக்கு கொஞ்சம் சுவாரசியம் கதையில் வந்திருந்தது . கொஞ்சம் யூகிக்கவும் முடிந்தது . மீண்டும் ஒரு சிகரெட் . இந்த கதையை எழுதியவள் பெயரை குறிப்பிட்டுக்கவில்லை . ஒரு வேளை ராஜகுமாரியைத் தவிர வேறு பெயரை அவள் விரும்பாதிருக்கலாம் . ஆனால் நிச்சயம் அவள் பெயர் ராஜகுமாரியாய் இருக்க முடியாது . விலாசம் இருக்கிறதா என்று பார்த்தேன் . இல்லை .

என்னடி இன்னிக்கு அவனை காணும் என்றாள் புவனா .

வராட்டி என்ன இப்போ ? உனக்குத்தான் அவனை பிடிக்கலை இல்ல ..

அதுக்கில்லடி . தினம் வருவானே அதான் . அங்க பாரு கணேசன் தவமிருக்கறதை . புவனாவின் சிரிப்பு கொஞ்சம் அகங்காரமாய் இருந்தது . சனியனே கணேசனை நீ வச்சுக்கடி . ராஜகுமாரனை எனக்கு கொடுத்துடுடி . பதிலுக்கு வேணும்னா என் உயிரை கூட எடுத்துக்கடி சண்டாளி . தோலை பாரு ..வெண் குஷ்டம் வந்தாப்ல .

கருப்புதாண்டி அழகு . காந்தல்தாண்டி ருசின்னு பாட்டி சொன்னது நினைவுக்கு வந்தது . அதெல்லாம் உப்புமாவுக்குதாண்டி கிழவி.. காதலுக்கு இல்லடி

என்னடி நீயே பேசிக்கறே ?

உன் வேலையை பாருடி . உனக்கு என்ன பெரிய ரதின்னு நினைப்பா ? இனிமே நமக்குள்ள ஃப்ரெண்ட்ஷிப் இல்லடி . போய் முதல்ல இந்த தோலுக்கு வைத்தியம் பாருடி . ஏ தோ பெரிய வியாதி மாதிரி இருக்கு ..

கண்ணை மூடி விஷத்தை கொட்டிக் கொண்டே இருந்தேன் . புவனா கண்கள் கலங்கி , அப்படியே உட்கார்ந்து அழ ஆரம்பித்தாள் . நான் கண்களை மூடிக்கொண்டேன் . ராஜகுமாரன் வருகிறான் . ஏறிக்கோ என்கிறான் . இருடா என்கிறேன் . புவனாவின் தோளை தொட்டு உலுக்கினேன் . மிரள விழிக்கிறாள் . வெறித்துப் பார்க்கிறாள் . இடது கையால் அணைத்து , இடையை வளைத்து என்னை ஏற்றிக் கொள்கிறான் ராஜகுமாரன்.. என் ராஜகுமாரன் ...


எனக்கு ஒரு அழைப்பு . ஒரு சிகரெடை பற்ற வைத்து மாடிக்கு வந்தேன் . அந்த கதை இன்னும் முடியவில்லை . அதாவது நான் இன்னும் முடிக்கவில்லை . ஏனோ எனக்கு அந்த பெண்ணை இல்லை.. அந்த ராஜகுமாரியை பார்க வேண்டும் போல் இருந்தது .


நான் செய்தது தப்பான்னு தெரியாது . ஆனா சரின்னுதான் நினைக்கிறேன் . என்ன பணினேன்னு கேளுங்க . சொன்னா எப்படியும் கரிச்சு கொட்டுவீங்க . பரவாயில்லை சார் . அந்த பாரத்தை இறக்கி வைக்கத்தானே இதை எழுதினேன் .


புவனா என்னுடன் பேசுவதில்லை . தனியாத்தான் போறா. நான் செஞ்சதுதான் தப்புன்னு உணர முடியுது . ஆனா விட்டு கொடுக்க தயாரில்லை . ஆனா கதை இப்படியாகும்னு எதிர்பார்க்கவேயில்லை .


என் கல்யாணத்துக்கு புவனாவை அழைத்தேன் . ஆனால் அவள் வரவில்லை . ராஜகுமாரனை ஏறிட்டு பார்த்தேன் . என்னவோ ஏமாற்றம் அவனிடம் . மறைக்க முடியவில்லை அவனால் . நான் முடிவெடுத்து விட்டேன்.. என் பிரிய ராஜகுமாரா .. என்னால் முடியலைடா ...


நான் அவ்வளவு அழகாடா பாவி !

ஆமாம் நீதான் அழகு .. நீ என் தேவதை .. என் ராஜகுமாரி என்றான் அவன் . எனக்குள் நிகழ்ந்ததை சொல்ல தெரியவில்லை .

அப்போ நீ புவனாவுக்காக சுத்தி வரலையா ?

சே.. அவளும் அவ கலரும் ..திமிர் பிடிச்சவன்னு எழுதி ஒட்டியிருக்கு . ஆனா நீ ..எவ்வளவு அமைதி .. பார்த்துக் கிடே இருக்கணும் போல இருக்கும் எனக்கு தெரியுமா ? எத்தனை நாள் ஒளிஞ்சிருந்து உன் முகத்தை மட்டும் பார்த்திருக்கேன் தெரியுமா ? நீ எதாவது சொல்லச்சே .உன் கண்ணு அதுக்கு முன்னாடி பேசுமே அழகு.. அப்புறம் அந்த சின்ன , குட்டி வாய் ..எக்ளேர்ஸ் சாக்லெட் மாதிரி...வேட்கையுடன் அவன் நாக்கு நீள்கிறது . என் நெற்றியில் ஈரமாய் ... மெல்ல நாசியில் இறங்கி , உதடுகளுக்குள் நுழைந்து ...என் நாக்குடன் சேர்ந்து ..காளிங்கன் நர்த்தனமாய்


எனக்குள் ஒரு பனிக்குடம் உடைகிறது . என் நகங்கள் நீள்கின்றன . புவனாவின் தாமரை முகத்தில் ரத்த கோடுகளால் ஒரு ஓவியம் ....அழ ஆரம்பிக்கிறேன்


இது நடக்காதுடா பாவி .. வெட்டிப் போட்ருவாங்க உன்னை . உன்னை பலி கொடுக்கவா நான் ? இந்த காதலுக்கு அல்ப ஆயுசுதாண்டா ... ஆனா ஒரு நாள் நான் உன் கூட வாழ்வேன் நிச்சயமா...


காத்திருக்கிறேன்னு சொல்லி பிரிகிறான் என் ராஜகுமாரன்

ஆனால் நான் அவனுடன் ஒரு நாள் வாழ்ந்தேன் . என் கல்யாணத்தன்று . எனக்கு நிச்சயம் செய்த மாப்பிள்ளையை நான் அவனாகத்தான் பார்த்தேன் . என்னால் அப்படிதான் பார்க்க முடிந்தது . அன்று இரவும்... வெறும் உடம்பில் என்ன இருக்கிறது . அது ஒரு சதைப்பிண்டம் . அவ்வளவுதானே . ஆனால் மனசு .. அது முழுதும் அவன் தானே ஊறியிருக்கிறான் .


இந்த கதையை எப்படி எடுத்து கொள்வதென்று எனக்கு தெரியவில்லை . ஆனால் அந்த ஊருக்கு போக வேண்டும். ரெண்டு பக்கமும் ததும்ப ஓடும் நீர் . நடுவில் அந்த பாதை . எங்காவது அவள் வாசம் இருக்கும்..இருக்க வேண்டும் .