அய்யனார்......கவிதை

வீட்டில் இருந்தால்

அம்மா மடி

வெளியில் என்றால்

அய்யனார் மடியில்

உருட்டு மீசையும்

முரட்டு பார்வையும்

எனக்கு மிகவும் பிடிக்கும்

குலசாமி என்று குடும்பத்தினர்

குலவை இடுவர்

எனக்கோ அவன்

சககூட்டாளிதான்...

அரளியை அரைத்து குடித்து

அம்மா செத்துப்போனதில்

அவனுக்கும் உடன்பாடில்லை

எனக்கும்தான்

அயலூர் வந்துவிட்டதால்

அவனை நேரில் பார்த்து

பல வருடங்களாயிற்று

இன்று என் கனவில்

வந்தான்

ஆபத்தென்றால்

அழைக்க சொல்லி

அவன் அலைபேசி

எண்ணையும் தந்தான்

காதை கிள்ளியது போல்

சிணுங்கியது அலைபேசி

அய்யனார்தான்..

குறுஞ்செய்தி அனுப்பியிருக்கிறான்

சிறப்பு பொருளாதார மண்டலம்

வருகிறதாம்.....

அவன் வசிப்பிடமும்

கைப்பற்று பட்டுவிட்டதாம்

காப்பாற்ற முடியுமா?