அசல்.................ஒரு போளி பார்வை

அசல் பற்றி விமர்சனம் எழுத சொல்லி நண்பர்கள் மிகவும் வற்புறுத்தி கேட்டுக் கொண்டார்கள். மெயிலிலும், கைபேசியிலும். டக்ளஸ் கோவிச்சிக்குவாரோ என்று முதலில் தயங்கினேன். சரி. ஆகறது ஆகட்டும். நட ராஜா.

மேற்கு மாம்பலத்தில்தான் முதல் அசல் போளி கடை இருந்தது. அதன் பெயர் வெங்கட்நாரயணா போளி ஸ்டால். பருப்பு போளி, தேங்காய் போளி இதெல்லாம் சிறப்பு ஐட்டங்கள். அதன் பின் ஓம்பொடி, காராசேவு, பாதுஷா. அப்புறம் மிளகாய் பஜ்ஜி, உருளைகிழங்கு போண்டா என்று தூள் கிளப்பினார்கள்.

அதன் வெற்றியை பார்த்து புற்றீசலாக போலி போளிகள் கிளம்பினார்கள். டி.கல்லுப்பட்டியிலிருந்து கிளம்பி வந்த ஆசாமி பெங்களூர் ஐயங்கார் பேக்கரி ஆரம்பிப்பதை போல், ஆளாலுக்கு பெயருக்கு பின்னால் கிருஷ்ணா ,நாரயணா என்றெல்லாம் கடைகளை பரப்பினார்கள். இவர் அவரின் மச்சான். இப்ப தனியா போயிட்டாருன்னு மக்களாகவே ஊகித்து கொண்டனர்.(ஊகித்தா? யூகித்தா?)

ஆனாலும் என்னால் அசலுக்கும், போலி போளிக்கும் வித்தியாசம் கண்டு பிடிக்க முடிந்தது. பின்ன? வேட்டைக்காரன் ரேஞ்சுக்கு எல்லா கடைகளிலும் ருசி பார்த்திருக்கிறேன். பார்சல் வாங்கி கொண்டு போய் காரில் உட்கார்ந்து மானிட்டருடன் சேர்த்து அமுக்கியதுமுண்டு.

அசல் படத்தின் கதைக்கும், மேலே எழுதியதை நீங்கள் ஸ்கிரோல் பண்ணாமல் படித்ததற்க்கும் ஒரு ஓற்றுமை இருக்கிறது. போக் ரோடில் உள்ள ஒரு டாஸ்மாக்கில் சரக்கு அடிக்கும்போது சிவாஜி பிலிம்ஸ் ஆட்கள் இருவர் போலி சரக்கின் உபயத்தில் அசலை பற்றி கொஞ்சம் அலசியதை நானும் அதே பாடாவதி சரக்கின் உபயத்தில் காது கொடுக்க நேர்ந்தது.

அசல் அஜீத்துக்கும், போலி அஜீத்துக்கும் இடையில் நடக்கும் அதிரடியான சண்டைக் காட்சி மட்டும் 15 நாட்கள் படமாக்கப்பட்டதாம். கொரியன் ஸ்டண்ட் இயக்குநர்கள் பணியாற்றியிருக்கிறார்கள். சிகரெட் வேணுமா பாஸ் என்று அவர்களிடம் குறுக்கிட்டேன். ஜக்குபாயை இணையத்தில் வெளியிட்ட கிக்குபாயைப் போல் என்னை பார்த்தார்கள். நீங்க பிரஸா ? என்று கேட்டார்கள். இல்லை. நான் தலைக்கு மேல் சுற்றிய பேனை (எப்படி வேணும்னாலும் அர்த்தம் எடுத்துக்கங்க!!) சிம்பாலிக்காக காட்டினேன். நீங்க பாங்காக் போனீர்களா? என்று கேட்டதற்கு அவர்கள் சொன்ன பதில்! இன்னொரு குவார்ட்டர் சொல்லுங்க! சேர்ந்து போயிடலாம்!

அசல் எந்த ஒரு ஆங்கில படத்தின் ஜெராக்ஸ் என்று தெரிந்து கொள்ள பிப்ரவரி 5 வரை காத்திருப்போம். ஆனால் ஷமிராரெட்டி என்கிற பருப்பு போளியும், பாவணா என்கிற தேங்காய் (மல்லுப்பா!) போளியும் அசல் சுவையாய் இருப்பார்கள் என்பதை வெங்கட்நாரயணா மீது ஜொள்ளீயம் செய்கிறேன்.